Жалпыұлттық коалициясы Шымкент қ. тұрғындарымен кездесті

Жалпыұлттық коалициясы мүшелерінің өңірлерге сапарлары жалғасуда. Мәжіліс төрағасы Ерлан Қошанов бастаған топ Шымкент қаласының тұрғындарымен жүздесті. Қозғалыс мүшелері ғылыми қауымдастық өкілдері, мәдениет саласы қызметкерлері мен кәсіпорындардың еңбек ұжымдарына Ата заң жобасының жаңа мәтінін түсіндірді. Кездесуде Негізгі құжаттың жаңа редакциясында адам құқықтарына, еңбек қауіпсіздігі мен білімге басымдық берілгені тілге тиек етілді.

Коалиция жетекшісі жаңарған Конституция жобасында ел дамуының іргетасын қалайтын негізгі құндылықтар айқындалғанын атап өтті.

Ерлан Қошанов, ҚР Парламенті Мәжілісінің төрағасы:

- Біз енді биік мұратқа бастайтын үлкен жолға қарай тағы да аттанып бара жатырмыз. Алдымызда ауқымды іргелі істер тұр. Оған біз қашан және қалай жетеміз? Біз тек әділет салтанат құрған кезде ғана жетеміз. Заң мен тәртіп үстемдік құрған кезде ғана жетеміз. Жастарымыз білім мен ғылымның, инновация мен технологияның тілін толық игерсе ғана жетеміз. Оған мың жылдық тарихымыз бен төл мәдениетімізбен жетеміз. Осының бәрі осы жаңа Конституцияда таңба басқандай көрініс тауып отыр.

Ардақ Монтаев, Auezov University саясаттану кафедрасының меңгерушісі:

- Әлемдегі геосаяси жағдайлардың тұрақсызданып, әлемде ынтымақ пен бірліктің, қауіпсіздіктің деңгейі төмендеуде. Әр мемлекет өзінің ішкі саясатын осындай жағдайда нығайтып, институттарын берік ұстауға мәжбүр. Осы жағдайда біздің мемлекет басшымыздың ұсынып отырған Конституциялық жаңаруы ол тек уақыт талабы ғана емес, ол стратагиялық қажеттілік. 

Веб-редактор: Нұрбек Балгүл Қайрошқызы