Сенат төрағасы Иран елшілігінде көңіл айту кітабына жазба қалдырды

Президент Қасым-Жомарт Тоқаевтың тапсырмасымен Парламент Сенатының Төрағасы Иранның Қазақстандағы елшісі Әли Акбар Джоукармен кездесті. Мәулен Әшімбаев қайғылы оқиғалар салдарынан елдің рухани көшбасшысы аятолла Сейед Әли Хаменеидің, мемлекет басшылығы өкілдерінің және бейбіт тұрғындардың қайтыс болуына байланысты көңіл айту кітабына жазба қалдырды. Жазбада «Қазақстан Республикасының Президенті Қасым-Жомарт Кемелұлы Тоқаевтың, Қазақстан халқының және Парламенттің атынан барша Иран халқына және қаза тапқандардың туған-туыстарына қайғыра көңіл айтамыз» - делінген. Халықаралық шиеленістерді тек саяси-дипломатиялық жолмен және БҰҰ Жарғысы мен халықаралық құқықтық нормалары аясында шешу туралы Мемлекет басшысының ұстанымы жеткізілді. Сенат төрағасы кез келген жағдайда адамгершілік қағидаттарға табан тіреу және халықаралық қақтығыстарды диалог пен келіссөздер арқылы шешу керектігін атап өтті. Әңгімелесу барысында Иран Қазақстанның жақын көршісі және серіктесі екені атап өтілді. Сондай-ақ, Сенат Төрағасы еліміздің қақтығысты бейбіт жолмен шешуге жәрдемдесуге дайын екеніне тағы бір назар аударды.

Веб-редактор: Нұрбек Балгүл Қайрошқызы