Қазақстанның ІТ-өнім экспорты 1 млрд долларға жетті

Қазақстанның ІТ-өнім экспорты 1 млрд долларға жеткен. 2025 жылы 100 астам отандық стартап шетелдік нарыққа шықты. Astana Hub технопаркі құрылғалы 7 жылда 840 млн доллардан астам шетел инвестициясы тартылып, 2 мыңға жуық резидент компания тіркелген. Бүгінде технопарк Еуразия құрлығының орта бөлігіндегі 8 елдің ІТ-мамандарына Google компаниясымен, силикон алабындағы Draper венчурлық университетімен, әлемдік акцелерятор Alchemist-пен бірлесіп жұмыс істеуге жол ашады.

Жамбыл Махметов, Astana Hub басқарушы директоры:

- Бізде әртүрлі бағытты қамтыған 10-нан астам әртүрлі акцелеряциялық бағдарламалар бар. Яғни, Google for Startups-пен бірлескен Silkway Accelerator тәрізді флагмандық бағдарламалармен қатар нақты жеке бағыттарды қамтитын жобаларды да іске асырып келеміз. Мысалы, жасанды интеллект бағытында AIpreneurs бағдарламасы, ақылды қалалар жобасына арналған Smart City бағдарламасы бар. Индустриялық бағытты қамтитын жоба аясында жаңа стартаптарды ірі өнеркәсіп нысандарында пилоттық сынақтан өтіземіз. Біздің бағдарламаларымыздан бір жылда 150-ден астам әртүрлі жоба өтті.

Технопарк резиденттері жасанды интеллект агенттерін әзірлеу бағытында белсенді ізденіс жүргізіп келеді. Салалық мамандарға арналған жасанды интеллект көмекешісіне озық шетелдік компаниялардан сұраныс артып отыр. Отандық IT-маман Бексұлтан Аукенов әзірлеген стартап платформасында заңгерлік, комплаенс, қаржы, бухгалтерия және салық жүйелеріндегі цифрлық көмекшілер бар.

Бексұлтан Аукенов, стартап өкілі:

- Қазір 10 шақты компаниямен келіссөз жүріп жатыр. Акцелерятордың көмегімен отандық Kashagan B.V. компаниясымен келісімшартқа кірістік. Тағы екі компанияда пилоттық режимде сынақ өткіземіз. Ірі тұтынушыларымыздың бірі – Google мен GSK компанияларының иелігіндегі британиялық фармацевтикалық алпауыт «Galvani Bioelectronics». Біздің өнімге қызығушылықтың сыры неде десек, ең алдымен біздің агенттер адамның жұмысын жеңілдетіп, уақытын үнемдейді. Біз жүйенің дербестігін қамтамасыз етіп, қызметкердің еңбек тиімділігін 40-тан 70% дейін арттырамыз.

Веб-редактор: Нұрбек Балгүл Қайрошқызы