Қазақстан Үкіметінде экономиканы әртараптандыру тәсілдері қаралды

Қазақстанда жылына – 50 мың тонна авиациялық отын өндіретін зауыт салынады. Оның құрылысына отандық инвесторлар мен америкалық серіктестерден 200 млн доллар қаржы тартылады. Бұдан бөлек, қолданыстағы үш мұнай өңдеу зауыты жаңғыртылып, қуаты 10 млн тонна болатын төртінші зауыттың құрылысы қолға алынады. Осылайша, мұнай өңдеу қуаты 2033 жылға қарай  40 млн тоннаға дейін жетпек. Сондай-ақ, биыл жыл соңына дейін 2,5 млрд текше метр көгілдір отын өндіруге қауқарлы ірі газ өңдеу зауыты іске қосылады. Бұдан бөлек, көмірден жылына 2 млрд текше метр газ өндіретін зауыт салу көзделіп отыр. Түпкі мақсат - жалпы өңдеу өнеркәсібінің қуатын еселеу.

Серік Жұманғарин, ҚР Премьер-Министрінің орынбасары, Ұлттық экономика министрі:

- Инвестициялық бағдарламаны іске асыру нәтижесінде көмір өндіру көлемі 1,4 есеге, темір кені өндірісі 1,8 есеге ұлғая отырып, концентраттар өндірісі 1,7 есеге артып, сұрыптық илемдеу шығару көлемі 2,3 есеге өседі. Сондай-ақ қуаты 4 млн тонна болатын жаңа құйма-илек кешені іске қосылады.

Елде галлий өндірісі де іске қосылады. Ол ұялы телефондар, компьютер чиптері, өзге де жоғары технологиялық өнімдерде қолданылады. Ал полиэтилен, бутадиен және карбамид шығару жөніндегі жобаларды жүзеге асыру өнім құнын 20 есеге дейін арттырады. Осы орайда,  қажетті шикізаттың тұрақты әрі сенімді жеткізу тізбегін қамтамасыз ету маңызды.

Олжас Бектенов, ҚР Премьер-Министрі:

- Отандық компаниялардың өңдеуіне қажетті  ішкі нарыққа қолжетімді  полимер шикізатын жеткізудің  ашық әрі тұрақты шарттарын қамтамасыз етуді тапсырамын. Өнеркәсіп министрлігі полимер өнімдерін одан әрі өңдеуге арналған  жобалардың нақты пулын ұсынсын.

Веб-редактор: Нұрбек Балгүл Қайрошқызы