Қ.Тоқаев энергетика саласы қызметкерлерін марапаттады

Бүгін Ақордада өткен салтанатты жиында еңбек адамдарына ерекше құрмет көрсетілді. Қазақстан Президенті энергетика саласы мамандарын кәсіби мерекесімен құттықтады. Энергетика – еліміз үшін стратегиялық маңызы бар сала. Республика әлемдік аренада бәсекеге қабілеттілігін жоғалтпау қамында заманауи өндіріс орындарын ашып, толыққанды цифрландырлық мемлекетке айналуды көздеп отыр.

Қасым-Жомарт Тоқаев, Қазақстан Республикасының Президенті:

- Cоңғы алты жылда электр энергиясын өндіру 16 миллиард киловатт-сағатқа артты. Бұл Қарағанды облысы сияқты өндірісі өркендеген аймақтың бір жылдағы қуат тұтыну көлемімен бірдей. Қазіргі кезде Қазақстанның электр энергетикасы жүйесіне жалпы қуаты 25 гигаваттан асатын 237 электр станциясы кіреді. Ал іс жүзінде қолданыстағы жалпы қуат көлемі – 21 гигаватт.

Инфрақұрылымды қалыпты деңгейде ұстап тұру үшін «Тарифті инвестицияға айырбастау» бағдарламасы іске қосылды. Сонымен қатар, Үкімет энергия нысандары мен инженерлік-коммуналдық желілерді жаңғыртудың Ұлттық жобасын бастап кетті. Оның аясында 2030 жылға дейін 86 мың шақырым желі жаңарады.

Қасым-Жомарт Тоқаев, Қазақстан Республикасының Президенті:

- Қазақстанның энергетикалық әлеуетін нығайту – басымдыққа ие міндет. Биыл батыс аймақтардың электр желісін күшейтетін бірегей жоба аяқталады. Бұл жоба Батыс Қазақстан, Атырау, Маңғыстау облыстарының энергетикалық тораптарын біріктіреді. Енді осы тораптарды бірыңғай ұлттық энергетика жүйесіне жалғау қажет. Елімізде басқа да ірі жобалар қолға алынып жатыр. Атап айтқанда, Екібастұздағы екінші ГРЭС-те жаңа энергоблоктар салынады. Сондай-ақ, үшінші ГРЭС-тің құрылысы басталмақ. Бұл нысандар еліміздегі энергетика жетіспеушілігін жоюға тиіс.

Бұған қоса, келесі жылы Қызылорда және Түркістан облыстарында бу-газ қондырғысы бар электр станциялары толық іске қосылмақ. Жаңа нысандар 2035 жылға дейін  жалпы көлемі 26 гигаваттан астам қуат көзін өндіреді деп күтілуде. Әлеует бұдан әлдеқайда жоғары. Бұл мүмкіндікті тиімді қолдану қажет. Осы ретте «таза көмір» технологиясына тезірек көшкен абзал. Еліміздің жер қойнауы аталған шикізат қорына бай. Жыл сайын 110 млн тоннадан астам көмір өндіріледі. Президент атом станциясының құрылысын бастау туралы стратегиялық шешімнің маңызына назар аударды.

Қасым-Жомарт Тоқаев, Қазақстан Республикасының Президенті:

- Балқаш атом электр станциясының құрылысы, одан кейінгі салынатын екінші АЭС Қазақстанның энергетикалық әлеуетін арттыратыны сөзсіз. Сондай-ақ ядролық энергетика сияқты маңызды салада жаңа бағыттардың дамуына септігін тигізетін болады. Қазақстанның энергетикалық картасында атом станциясының пайда болуы ел экономикасының жаңа әрі сапалы деңгейге көшкенін білдіреді.  

Қасым-Жомарт Тоқаев еліміздің энергетика саласын дамытуға елеулі үлес қосқаны үшін бір топ азаматты мемлекеттік наградамен марапаттады.

Веб-редактор: Айнұр Досан