2025 жылы Қазақстанның ЖІӨ 6,5% өсті

2025 жылдың қорытындысы бойынша Қазақстанның жалпы ішкі өнімі 6 жарым процентке өсті. Бұл мәліметті алдын ала есеп бойынша Ұлттық статистика бюросы жариялаған. Өткен жылы экономикалық өсімге көлік, құрылыс және сауда салалары негіз болған. Ең көп үлес көлік және қоймалау саласына тиесілі, мұндағы өсім 20 жарым процентті құрады. Бұл жүк тасымалы көлемінің, ең алдымен автомобиль және теміржол көлігі арқылы тасымалдаудың ұлғаюына байланысты орын алған. Мұның ықпалынан қосымша көлік қызметтерінің көбеюі тіркеліп, әуежайлардың, қоймалар мен пакгауздар қызметтерінің, астық және тоңазытылған жүктерді сақтау қызметі көлемінің артуы байқалды. Былтыр Қазақстанда инфрақұрлымдық және әлеуметтік жобалар белсенді жүзеге асырылып, құрылыс саласына қарқын берді. Саладағы өсім 16 процент шамасында болған.  Өнеркәсіп өндірісінің жылдық индексі 7,4% құрады. Ал, өңдеу секторы 6,4% деңгейінде тұрақты даму қарқынын көрсетуде. Жалпы алғанда, экономиканың жиынтық өсімі негізгі салалардың тұрақты дамуын айғақтады. Естеріңізге сала кетейік, Қазақстан Орталық Азиядағы әлемнің ірі 50 экономикасының қатарына енген жалғыз ел. Бұдан бөлек, республика нақты жалпы ішкі өнімнің орташа жылдық өсу қарқыны бойынша көшбасшы елдер бестігіне енді.

Веб-редактор: Нұрбек Балгүл Қайрошқызы