Жаңа Конституция жобасы - прогрессивті құжат

Конституцияның жаңа жобасында ғылым мен технологиялық даму Қазақстанның мемлекеттік басымдығына айналмақ. Премьер-Министр Олжас Бектенов ғылым мәселелері бойынша кеңес өткізді. Үкімет басшысы жаңа Ата заң жобасын ашық әрі нақты түсіндірудің маңыздылығына тоқталды. Құжатта қоғамда болып жатқан жоспарлы саяси және экономикалық өзгерістері көрсетіліп, ел дамуының жаңа бағдарлары, оның ішінде білім, ғылым және инновация саласындағы басымдықтар белгіленгені атап өтілді. 

Олжас Бектенов, ҚР Премьер-Министрі:

- Ата заңның жаңа жобасы Қазақстанның ұзақ мерзімді даму бағдарын айқындайтын, әлеуметтік әділдік пен құқықтық теңдік сияқты аса маңызды құндылықтарды қамтамасыз ететін прогрессивті құжат. Жаһандық деңгейдегі өзгерістер мен жоғары технологияның қарқынды дамуы және «орта державалар» рөлінің артуы жағдайында конституциялық реформаның заман талабына сай уақтылы жасалған қадам екенін атап өткім келеді.

Талқылау барысында ғылыми ортаның өкілдері жаңа Конституция жобасын қолдап пікір білдірді. Ғылымды мемлекеттің тұрақты дамуының негізі ретінде шоғырлантыру жөніндегі бастамалар ерекше атап өтілді. Айта кетелік, соңғы үш жыл ішінде республикалық бюджеттен ғылымды қаржыландыру көлемі 3 жарым есеге ұлғайып, биыл 214 млрд теңгені құрады. Президент 2029 жылға қарай бұл көрсеткішті ЖІӨ-нің 1%-на дейін жеткізу міндетін қойды.  

Ақылбек Күрішбаев, Ұлттық ғылым академиясының президенті:

- Қазіргі өзгерістердің логикасы неде? Қазіргі жаһандық өзгерістер халықаралық стандарттар, құндылықтар өзгеріп жатқан кезеңде Қазақстан мықты жүйе құруы керек. Ал, енді мықты мемлекеттік жүйе құру үшін, әрине, заңдар өзгеруі керек, заң да мықты болуы керек. Соның ішінде бірінші кезекте Ата заңымыз.  Осыған байланысты үлкен өзгерістер бар, бұл мемлекеттің ертеңгі күнін ойлайтын іс қимылы деп білуге болады.

Сондай-ақ, жиында Ғылымды шоғырландыру аумақтарын құру және дамыту тұжырымдамасы талқыланды. Осы орайда ғылым академиясы ұсынған технологиялық дамудың басымдықтарын айқындаудың жаңа моделін құзырлы министрлік 1 наурызға дейін қарастыруы тиіс. Салалық органдарға осы мерзімге дейін технологиялық және өндірістік міндеттерді шешу мен қолданбалы ғылыми әзірлемелерді енгізу жөніндегі жол карталарын бекіту міндеттелді. Ал Ұлттық ғылым академиясына 1 сәуірге дейін Ғылыми-технологиялық форсайт орталығын құру жүктелді. 

Веб-редактор: Нұрбек Балгүл Қайрошқызы