Қазақстан Түркі елдерінің сауда-өнеркәсіп палаталары одағына төрағалық етеді

Қазақстан биыл Түркі тілдес елдердің сауда-өнеркәсіп палаталары одағына төрағалық етеді. Бұл жөнінде Астанада өткен ұйымның ІІІ жалпы отырысында мәлімделді. Одақ құрылған 2019 жылдан бері оның құрамы кеңейіп келеді. Оған еліміз бен қатар Әзербайжан, Қырғызстан, Түркия, Өзбекстан мен Түрікменстан енген. Елордадағы жиында Мажарстанның ресми мүшелігі айғақталды. Түркі экономикалық кеңістігі 180 млн астам халықты қамтиды және ірі өндірістік, ресурстық әлеуетке ие. Мақсат өзара алыс-беріс аясын кеңейтіп, өнеркәсіптік кооперация мен бірлескен жобаларды дамыту, сондай -ақ халықаралық бағыттар мен көлік дәліздерін жетілдіру. Осы орайда Түркі инвестициялық қоры құралдарын тиімді пайдалану көзделіп отыр.

Вугар Зейналов, Әзербайжан кәсіпкерлер конфедерациясының вице-президенті:

- Қор биылдан бастап жұмысқа кірісті. Меніңше бұл біздің төрағалық барысында атқарған ірі қадамдарымыздың бірі болды. Біздің түркі қорына ұсынған бастамаларымыздың бірі – Каспий теңізіндегі сауда трафигін арттыру. Біз оны осы жылдан бастап жүзеге асырамыз деп ойлаймын.  Бұл түркі елдері бірлестігі үшін аса маңызды. Себебі, қазір Каспий теңізі арқылы сауда-саттық мақсатында үлкен жүк трафигі өте бастады.

Қазақстан үшін түркі бағыты – сыртқы экономикалық саясаттың басым бағыттарының бірі. Былтыр қаңтар-қазан айларының қорытындысы бойынша республиканың түркі елдерімен тауар айналымы 11 млрд долларға жетіп, 10% астам өскен. Дені экспортттың үлесіне тиесілі. Қазақстанның ұйым елдеріне жөнелткен тауар көлемі шамамен 17 % артып, 8 млрд  долларға жуықтады. Бұл біздің тарап ұсынысының  құрылымдық сапасы артқанын айғақтады. Еліміздің

логистиканы оңтайландыру ісіндегі тәжірибесі Ұйым қызметіне оң ықпал тигізеді деп күтілуде.

Райымбек Баталов, ҚР «Атамекен» Ұлттық кәсіпкерлер палатасы төралқасының төрағасы:

- Көлік және логистика мәселелері белгілі-бір тар аумақтарға, сауда-саттықта кептеліс тудыратын  нысандарға инвестиция салуды талап етеді. Олар көбінесе теміржол өткелдерімен, теңіз жолдарымен, көлік түрлерінің тапшылығымен байланысты. Біріншіден осы бағытты қолға аламыз. Екіншіден өзара сәйкестендіруді қажет ететін ел аралық құжат айналымы бар. Қазір біз бұл саланы цифрландыру туралы бастама көтердік. Қазақстан бұл бағытта жақсы үлгі көрсетіп келеді. 

Веб-редактор: Нұрбек Балгүл Қайрошқызы