Қазақстан Президенті кәсіпкерлерді марапаттады

Бүгін Астанада «Алтын сапа» және «Парыз» сыйлығының лауреаттарын, сондай-ақ «Қазақстанның үздік тауары» байқауының жеңімпаздарын марапаттау рәсімі өтті. Оларға наградаларды Мемлекет басшысы табыс етті. Қасым-Жомарт Тоқаев Бәсекеге қабілетті бизнес – кез келген мемлекеттің тірегі екенін ерекше атап өтті. Отандық тауар өндірушілер сапалы және сұранысқа ие өнім шығару арқылы ел экономикасының дамуына орасан зор үлес қосуда. Қазақстан Президенті экономика өсімі жоғары қарқын көрсетіп отырғанын тілге тек етті. Биыл ол 6%  асады деп болжануда.  Елдің ішкі жалпы өнімі алғаш рет 300 млрд доллардан аспақ. Қасым-Жомарт Тоқаев сондай-ақ үкіметке дайын өнім экспортын арттыру бойынша белсенді жұмыс жүргізу қажеттігіне назар аударды.

Қасым-Жомарт Тоқаев, Қазақстан Республикасының Президенті:

- Өңдеу өнеркәсібіндегі қосымша құн көлемі бес жылда 25 пайыздан астам өсті. Бұл – тау-кен саласынан едәуір жоғары көрсеткіш. Соңғы жылдары негізгі капиталға тартылған инвестиция 70 пайызға көбейді. Нақты сектордағы еңбек өнімділігі 40 пайызға артты. Шикізаттық емес экспорт көлемі 2 есеге жуық ұлғайды. Тауарын шетелге өткізетін кәсіпорындар саны 3 есе көбейді. Соның арқасында бүгінде өнімдеріміз 140 мемлекетке шығарылады. Қазақстан тауарлары әлемдік нарықтан өз орнын алып жатыр деп күмәнсіз айтуға болады.

Бүгінде елімізде жұмыс істейтін азаматтардың жартысына жуығы, яғни 4,5 миллион адам бизнес саласында еңбек етеді. Мемлекет басшысы шағын және орта бизнесті дамытуға айрықша мән беріп отырғанын, негізгі мәселенің бәрі де жеке бақылауында екенін жеткізді. Инфляцияны төмендету, жаңа Салық кодексін тиімді іске асыру, елдің инвестициялық тартымдылығын күшейтіп, мемлекеттің экономикаға араласуын азайту жөніндегі реформаларды жалғастыру маңызды. Қасым-Жомарт Тоқаев қосылған құны жоғары өнім өндіретін кәсіпкерлер үшін қолайлы жағдай жасау қажеттігін ерекше атап өтті.

Қасым-Жомарт Тоқаев, Қазақстан Республикасының Президенті:

- Осы мақсатта менің тапсырмаммен «Даму» қоры жанынан шағын және орта бизнеске, сондай-ақ ірі инвестициялық жобаларға арналған екі кепілдік қоры құрылды. Аталған бағыт аясында 2229 жобаға жалпы сомасы 400 миллиард теңгеден астам кредит берілді. Оның ішінде 220 миллиард теңгеден астамы мемлекеттік кепілдікпен қамтамасыз етілді. Іскерлік белсенділікті одан әрі ынталандыру үшін шағын бизнесті қолдаудың бірыңғай бағдарламасын жедел қабылдаған жөн. 

Веб-редактор: Айнұр Досан