Қазақстан ірі цифрлық жобаларды жүзеге асыруда

Қазақстан Каспий теңізі түбінен тартылатын Әзірбайжанға дейін оптикалық-талшықты байланыс желісін салу жобасын іске асыруды бастады. Жаңа бағыт халықаралық интернет-трафиктің транзитін күшейтіп, елдің Еуропа мен Азия арасындағы сандық көпір ретіндегі рөлін нығайтуы тиіс. Премьер-Министрдің орынбасары, Жасанды интеллект және цифрлық даму министрі Жаслан Мәдиев нысанның құрылысын жыл соңына дейін аяқтау жоспарланғанын мәлімдеді. Сонымен қатар, елімізде жаһандық деңгейдегі деректерді өңдеу орталықтарын дамыту қолға алынған. Бұдан басқа, Қазақстан спутниктердің өндірісін ұлғайтуды көздейді. Отандық ғарыш аппараттарын экспорттау жағы да жолға қойылмақ.

Жаслан Мәдиев, ҚР Премьер-Министрінің орынбасары, Жасанды интеллект және цифрлық даму министрі:

- Отандық спутниктерді өндіру кешені Жасанды интеллект және цифрлық даму министрлігіне тиесілі. Біз қазір осы кәсіпорынның қуатын жүктеу бойынша жұмысты бастадық. Алдағы жылдары өндіріс алаңында жерді қашықтықтан зондтаудың кемінде 5-6 жерсерігін шығару көзделіп отыр. 75 млн долларға ғарыш аппараттарын экспорттау жоспарланған. Бұл Қазақстан тарихында алғашқы технологиялық экспорт саналады.

Сондай-ақ, салалық министрліктің мәліметінше, елімізде өңірлерді жоғары жылдамдықты интернетке қосу жалғасуда. Алдағы екі жылда 3 мыңнан астам ауылдық елді мекен оптикалық талшықты байланыспен қамтамасыз етіледі. Осылайша, ел халқының 99% интернетке қол жеткізеді. Сондай-ақ, ғаламтор желісін тікелей үйге жеткізу қамында «соңғы миль» жобасы іске асырылуда. Еліміздің 20 қаласында іске қосылған 5G жаңа буын мобильдік байланысы да кеңейтілуде. Сонымен қатар, IT-сектордың экономикаға қосқан үлесі де өсуде. Жыл қорытындысы бойынша қазақстандық ІТ-қызметтер экспортының көлемі 1 млрд. долларға жетті.

Веб-редактор: Нұрбек Балгүл Қайрошқызы