Қ.Тоқаев сумошы Е.Балтағұлды қабылдады

Мемлекет басшысы Қасым-Жомарт Тоқаев қазақстандық сумошы Ерсін Балтағұлмен кездесті. Президент спортшының былтыр «маэгашира» атағын, яғни сумо балуандарының ең жоғары дәрежесін иеленіп, «Канто-се» арнайы жүлдесін алуымен құттықтады. Мемлекет басшысы шет мемлекеттерде елімізді әлемге танытып жүрген жастарымыздың көбейіп келе жатқанын, мемлекеттің таланттар мен спортты қолдауға ерекше көңіл бөлетінін атап өтті. Президент спорт саласындағы елеулі еңбегі үшін сумошы Ерсін Балтағұлды ІІ дәрежелі «Барыс» орденімен марапаттады. Кездесу соңында Қасым-Жомарт Тоқаев балуанға алдағы уақытта да халықаралық жарыстарда жоғары нәтижелерге қол жеткізіп, ел абыройын асқақтатуға тілектестік білдірді.

Веб-редактор: Айнұр Досан