Халық кеңесі - жалпыұлттық диалог алаңы

Жаңадан құрылатын жоғары консультативтік орган - Халық кеңесі бұрынғы Ұлттық құрылтай мен Қазақстан халқы Ассамблеясының тәжірибесін біріктіреді. Мемлекет басшысы оның құрамына барлық этностар мен өңірлердің өкілдері кіретінін айтты. SARAP сарапшылар клубы Халық кеңесіне ең беделді қоғам белсенділері еніп, өзара төрағаны сайлауы тиіс екенін айтады. Жаңа орган заңнамалық бастамалар ұсыну құқығына ие болады. Ал мұндай өзгеріс азаматтардың шешім қабылдаудағы рөлін күшейтеді.

Жұлдызай Ысқақова, Қазақстандық қоғамдық даму институтының басқарма төрағасы:

- Мұндай маңызды институттардың құрылуы өте өзекті. Олар билік пен қоғам арасындағы ақпаратты жеткізу мен өзара алмасудың қосымша тетігіне айналады. Қазір Конституциялық комиссияның жұмысы жүріп жатыр. Бүгін оның бесінші отырысы өтеді. Дәл осы кезеңде сараптамалық қолдаудың маңызы зор. Біз бүгін ортақ ұстанымдарды қалыптастыру, пікір алмасу мақсатында жиналдық.

Мәжіліс депутаты Юлия Кучинская Халық кеңесі қоғамдық пікірді білдірудің қуатты институтына айналады деп есептейді. Бұл алаңда айтылған идеялар нақты заңға айналады.

Юлия Кучинская, ҚР Парламенті Мәжілісінің депутаты:

- Бұл - мемлекеттік деңгейдегі консультативтік-кеңесші орган, ол заңнамалық бастама құқығына ие болады. Бұл өте маңызды. Себебі, осы алаңда айтылған ой, жай ғана ұсыныс емес, заңнамаға бастау болу ықтималдығы бар, үлкен салмаққа ие пікір болады. Өкілдік тұрғысынан мұндай құрамның жиылуы аса ұтымды. Меніңше, этномәдени бірлестіктердің 42 мүшесіне мінбер ұсыну,  бұрынғы 5 адамдық квотадан қарағанда тиімдірек. Бұл әрбір өңірдің өкілдері үшін және ел аумағындағы барлық этномәдени бірлестіктер үшін үлкен мүмкіндік болып табылады

Веб-редактор: Айнұр Досан