Астанада Ұлттық құрылтай секцияларының отырысы өтті

Ұлттық құрылтай қоғам қажеттілігін шешуге қауқарлы негізгі талқылау алаңдарының бірі ретінде өз мүмкіндіктерін нығайтып келеді. Мұны сарапшылар платформасының жыл қорытындысы айғақтайды. Ұлттық құрылтай секцияларының отырысында мемлекеттік кеңесші Ерлан Қарин экономика тұрақты өсім көрсеткенін, жаңа кәсіпорындар іске қосылып, тұрақты жұмыс орындары құрылғанын, әлеуметтік нысандар құрылысы қарқын алып, көлік инфрақұрылымын жаңғырту ісі жалғасып жатқанын атап өтті. Бұл даму көрсеткіштері ел Президентінің кең ауқымды реформаларының нәтижесі, - деді мемлекеттік кеңесші. Ал, Президент бастамашылық еткен парламенттік реформа «Күшті Президент – ықпалды Парламент – есеп беретін Үкімет» мемлекеттік құрылыстың базалық формуласы аясындағы ауқымды саяси жаңғырудың логикалық жалғасы.Қазіргі таңда парламенттік реформа бойынша жұмыс тобы сарапшылармен және ел тұрғындарымен бірлескен ауқымды талқылау жүргізіп жатыр. Ерлан Қарин Мемлекет басшысының тапсырмалары мен Бурабайда өткен IV отырыста Ұлттық құрылтай мүшелері тарапынан айтылған бастамаларға да тоқталды.

Ерлан Қарин, ҚР Мемлекеттік кеңесшісі:

- 53 тармақтан тұратын жоспарды қабылдадық. Сол жоспарда көрсчетілген барлық бастамалардың жүзеге асырылуын бақылауға алдық. Бұл жұмыстың аясында 10-ға жуық заң қабылдануы керек. Бірнеше үлкен нормативтік құжаттар қабылдануы керек.

Сонымен қатар, бірқатар концептуалдық құжаттар әзірленді, олардың қатарында ішкі саясаттың бағыты мен негізгі принциптері айқындалған. Ұлттық құрылтай бастамаларының бір бөлігі толық іске асқан, өзгелері бойынша жұмыс жалғасып жатыр. Дәлірек айтқанда, балалардың құқықтарын қорғауға бағытталған шараларды біріктіретін «Қазақстан балалары» біртұтас бағдарламасы әзірленуде, ғылыми қалашықтар құру, үкіметтік емес ұйымдардың қызметін реттеу, ерекше қажеттіліктері бар балаларды кешенді қолдау және басқа да бағыттар бойынша заңнамалық нормалар дайындалуда. Секциялар аясында Ұлттық құрылтай мүшелері Президент бастамаларының жүзеге асырылуын қолдап, жекелеген бағыттарға қатысты ұсыныстарымен бөлісті. Ұлттық құрылтайдың V отырысын келесі жылы Қызылорда қаласында өткізу жоспарланып отыр.

Веб-редактор: Нұрбек Балгүл Қайрошқызы