Шетелдегі қазақстандықтар референдумға белсенді қатысуда

Бүгін әлемнің ондаған елінде Жаңа Конституция бойынша референдум учаскелері жұмыс істейді. Олар Республикамыздың дипломатиялық өкілдіктері аумақтарында орналасқан. Бірінші болып Оңтүстік Корея және Жапониядағы қазақстандықтар дауыс берді. Токиода «Нихон» университетінің студенті Жібек Айдын таңсәріден азаматтық жауапкершілік танытты. Ол қабылданған шешім Қазақстанның бірізді әрі қарқынды дамуына негіз болатынына сенімді.

 Жібек Айдын, Қазақстан азаматы:

— Бүгін мен жаңа Конституцияға орай республикалық референдумға қатысуға келдім. Себебі бұл қадам еліміз үшін маңызды күн. Осындай кезде әр азамат шетте ұалмай өз дауысын беру керек деп ойлаймын. Қазақстанның болашағы мен үшін маңызды сол себептен мен бүгін келіп, өз дауысымды беріп азаматтық міндетімді орындауға келдім. 

Бақытжан Сүйіндіков, Токиодағы № 425 учаскелік референдум комиссиясының төрағасы /Жапония/:

– Бүгін №425-ші референдум учаскесі Токио уақыты бойынша сағат 7-де өзінің жұмысын бастап, қазіргі уақытта дауыс беру үдерісі жүріп жатыр. Қазақстан республикасының Заңнамасына сәйкес Жаппоняида уақытша тұрып жатқан азаматтарымыз үшін өздерінің коституциялық құқықтарын жүзеге асыруға барлық мүмкіндік жасалған. Көптеген отандастарымыз, әсіресе, жастар Елшіліккке хабарласып, тізімге еніп жатуына қарағанда бүгін дауыс берушілер үлкен белсенділік танытады деп күтеміз. 

Қазақстандықтар Қытай, Сингапур, Моңғолия, Малайзия, Таиланд, Вьетнам, Индонезия, Үндістан, Ресей, Әзірбайжан, Армения, Грузия, Орталық Азия елдері мен Пәкістанда дауыс береді. Саида Жанпейісова 8 жылдан бері Исламабадта тұрады. Ол сайлау учаскесіне өз таңдауын жасауға келген.

Саида Жанпейісова, Қазақстан азаматы:

- Бүгін мен Қазақстан елшілігіне ҚР жаңа Конституциясы бойынша референдумға дауыс беру үшін келдім, елімнен жырақта болсам да, мұны өз борышым деп санаймын. Қалай болғанда да бұл менің парызым, менің ұстанымым.

Ал Бангкоктағы № 453 референдум учаскесінде Қазақстанның Ұлттық олимпиада комитетінің және World Boxing халықаралық ұйымының президенті Геннадий Головкин дауыс берді. Ол азаматтардың ел үшін маңызды шешімді қабылдауға қатысуының маңызын атап өтіп, референдум мемлекеттің одан әрі дамуы мен нығаюында маңызды рөл атқаратынын айтты.

Веб-редактор: Айнұр Досан