Қазақстанда AlemGPT платформасы іске қосылады

Қазақстанда ақпан айында AlemGPT АІ-платформасын іске қосу жоспарланған. Негізгі мемлекеттік қызметтер оған кезең-кезеңмен қосылатын болады. Қазіргі таңда елімізде аталған мультиагенттік жүйе сынақтан өтуде.  Бір платформада қазақстандықтар мен бизнес толық циклді мемлекеттік қызметтерді ала алады. «Ұлттық ақпараттық технологиялар» компаниясының мамандары атап өткендей, AlemGPT өткен жазда іске қосылған Alem Cloud суперкомпьютерінің ресурстары есебінен жұмыс істейді. Айта кетейік, бот пайдаланушыны барлық кезеңдерде алғашқы сұраныстан соңғы нәтижеге дейін диалог форматында сүйемелдейді. Ең бастысы – AlemGPT-ға өз жағдайын мәтінмен сипаттау қажет. Ал ол қажетті қызметтерді таңдап, түрлі анықтамаларды онлайн ресімдеуге көмектеседі. Ол үшін жүйеге байланыс орталықтары мен халыққа қызмет көрсету орталықтарының деректері негізінде қалыптастырылған бірыңғай база интеграцияланады. Сонымен қатар, сұраныстарды түсіну үшін жүйе отандық тіл моделіне қосылған. Ол қазақ, орыс және ағылшын тілдерін таниды.

Қуандық Жайлашев, «Ұлттық ақпараттық технологиялар» АҚ департаментінің директоры:

- AlemGPT әртүрлі тілдік үлгілерді қосу мүмкіндігі бар AI-агент платформасында құрылған. Қазіргі уақытта біз оған өзіміздің LMM ұлттық тілдік моделімізді қостық. Осылайша біз оны оқытып, дамытып, алғашқы мемлекеттік қызметтерді енгіземіз. Оның ішінде біз жылдар бойы жинаған білім базасы бар. Яғни, байланыс орталығы арқылы және халыққа қызмет көрсету орталықтиарын пайдаланып, осы білім базасын мемлекеттік қызметтер мен сұрақтарға кеңес беру үшін қолданатын боламыз.  

Веб-редактор: Нұрбек Балгүл Қайрошқызы