АХҚО сотында дауларды шешудегі АІ рөлі талқыланды

АХҚО Сотында Жасанды интеллект халықаралық коммерциялық дауларды шешуде және төрелік процестерде белсенді қолданылатын болады. Елордада жаңа жүйе таныстырылды. Бұл технология отырыстарды орыс және ағылшын тілдеріне автоматты түрде аударуды қамтамасыз етеді. Мұндай заманауи жүйе істерді қараудың ашықтығы мен тиімділігін арттырып, барлық дәлелдеме материалдары мен құжаттарды тіркеуді жеделдетпек.

Кристофер Кэмпбелл-Холт, АХҚО және ХТО сотының тіркеушісі және аппарат басшысы:

- Бұл жаңа әрі озық технология Қазақстанның инвестициялық тартымдылығын арттыруға елеулі үлес қосады деп ойлаймын. Өйткені дәлелдемелерді тіркеу және сот отырыстарының хаттамаларын жүргізу сапасын айтарлықтай жақсартады. Мен заңгерлер мен судьялар оның мүмкіндіктерін бағалайтынына, ал инвесторлар Қазақстанды тартымды бағыт ретінде қарастыруын жалғастыратынына үміттенемін. Біз қазірдің өзінде сот пен төрелік арасында AI-технологияларды қолдану саласында әлемдік көшбасшылармыз.

Тағы бір сандық шешім - Legal Tech Lab. Бұл - АХҚО Сотының, Халықаралық төрелік орталығының, Maqsut Narikbayev University, Astana IT University және Қытай саяси ғылымдар мен құқық университетінің бірлескен жобасы. Жаңа платформа заң құжаттарын дайындау, төрелік және басқа да рәсімдерді қолдау үшін АІ-шешімдерді  әзірлейді. Бұл туралы әлемнің жетекші мамандары мен құқықтық технологиялар және жасанды интеллект жөніндегі сарапшылардың қатысуымен өткен форум алаңында айтылды. Сарапшылар бүгінде жасанды интеллект жаһандық сот тәжірибесінің маңызды бөлігіне айналғанын, ал жаңа AI-технологиялары өңірдегі төреліктің сапасын жақсартатынын алға тартады.

Сергей Пен, MNU Басқарма төрағасының Ғылым, инновациялар және жасанды интеллект жөніндегі орынбасары:

- Экономикалық институттарды біріктіру - ол технологиялық саладағы сараптама ісін дамытуға тың серпін береді. Себебі біз машиналық оқыту туралы айтқанның өзінде, ол заңгер ретінде шешім қабылдауға үйренуі үшін жасанды интеллект моделін оқытудың мүлде жаңа құрылымын құрады. Біздің мақсат - Қазақстанның технологиялық жетілуін, әсіресе заң технологиясы саласында дамудың озық деңгейіне өтуіне септесетін осы  бірегей жүйені енгізу.

Веб-редактор: Нұрбек Балгүл Қайрошқызы