Жаңа Конституцияда отбасын қорғау күшейтіледі

Қазақстанның жаңа Конституциясының жобасы қоғаммен кең талқылануда. Астанада өткен халықаралық конференцияда депутаттар мен сала мамандары неке қатынасы бойынша ұсынылған өзгерістерге тоқталды. Жобаның 27-бабында неке мен отбасы, мемлекеттің қорғауында, ал балаларға қамқорлық ата-ананың табиғи құқығы әрі міндеті ретінде бекітіледі. Және керісінше, 30-бапта 18 жасқа толған әрі еңбекке қабілетті азамат күнкөрісі қиындаған ата-анасына қарауға міндетті болмақ. Қатысушылар мұндай өзгерістер ұлттық мәдениетке негізделген заңнама қалыптастырып, дәстүрлі отбасы құндылықтарын қорғауға жол ашатынын алға тартады. Жиында әйел мен бала құқығын қорғау,  ерлі зайыптылар қарым-қатынасын үйлесімді заңдастыру тетіктері жоғары бағаланды.  

Екатерина Смолякова, ҚР Парламенті Мәжілісінің депутаты:

- Құндылықтар жүйесінің жаңаруы, кеңеюі деп айтсам болады. Соның ішінде отбасылық құндылықтарға ерекше мән берілген, жаңа Конституцияда. Неке және отбасы, ер адам мен әйел адамның тең құқылы және ерікті одағы деп нақты жазылған. Сонымен қатар, ана болу, әке болу, балалық шақ мемлекеттің қорғауында делінген.

Нұргүл Тау, ҚР Парламенті Мәжілісінің депутаты:

- Бұл жерде ана, әке және бала. Осы үшеуін бір отбасылық құндылық қылып көрсетіп отырмыз. Отбасы дегеннің не екенін осы анықтамадан-ақ қарап мағынасын білуге болады. Осы Конституция шыққаннан кейін салалық заңдар толыққанды өзгеретін болады. Бұрын болмаған түзетулер кіргендіктен, отбасы туралы заңға, балалардың құқығы туралы заңға, білім туралы заңға, басқа да осындай заңдардың көбісіне түзетулер енгізілетін болады. 

Веб-редактор: Айнұр Досан