Сенат төрағасы Қазақстанның бейбітшілікті ілгерілетудегі тәжірибесімен бөлісті

Сенат спикері Мәулен Әшімбаев Абу-Дабиде шейх Заид атындағы «Адамзат бауырластығы» сыйлығын салтанатты тапсыру рәсімі аясында Қазақстанның конфессияаралық диалогты ілгерілету тәжірибесіне тоқталды. Іс шарада Президент Қасым-Жомарт Тоқаевтың жаңа жаһандық бейбітшілік қозғалысын қалыптастыру туралы үндеуінің маңызы мен Әлемдік және дәстүрлі діндер көшбасшылары съезінің қызметі туралы айтылды.

Мәулен Әшімбаев, ҚР Парламенті Сенатының төрағасы, Әлемдік және дәстүрлі діндер көшбасшылары съезі хатшылығының басшысы:

- Былтыр қыркүйек айында Астана қаласында «Діндер диалогы: болашақ жолындағы синергия» тақырыбымен Әлемдік және дәстүрлі діндер көшбасшыларының VIII съезі өтті. Оның маңызды нәтижелерінің бірі конфессияаралық диалогты одан әрі нығайтуды көздейтін бірқатар халықаралық бастаманы қамтыған «Астана бейбітшілік декларациясы-2025» құжатының қабылдануы болды.

Әзербайжан мен Армения арасындағы бейбіт келісім де «Адамзат бауырластығы» сыйлығына лайық деп танылды. Екі ел арасындағы келісімдердің негізгі кезеңі Алматыда өткен болатын. 

Веб-редактор: Айнұр Досан