Қазақстан Президенті UAE SWAT Challenge жеңімпаздарын марапаттады

Ақордада UAE SWAT Challenge-2026 халықаралық жарысынан жүлделі оралған командалар марапатталды. Қасым-Жомарт Тоқаев жеңімпаздарды құттықтап, олар нағыз қазақ жауынгері рухының қандай болатынын әлем жұртшылығына паш еткенін, Қазақстанның беделін биікке көтергенін атап өтті. Естеріңізге сала кетейік, 48 елдің 109 командасы қатысқан жарыста отандық арнайы бөлімшелер үздік нәтиже көрсетті. Екі қазақстандық команда турнирдің алтын және күміс жүлдесін иеленді.

Қасым-Жомарт Тоқаев, Қазақстан Республикасының Президенті:

- Мемлекет әскери-күштік құрылымдарды кешенді түрде жаңғыртуға, технологиялық тұрғыдан жан-жақты жарақтандыруға баса мән береді. Сіздердің жарыстағы табыстарыңыз – еліміздің күштік құрылымдарын жүйелі дамытудың, әскер қатарындағы жоғары моральдық рух пен физикалық даярлықтың нәтижесі. Сіздер Отанға қалтқысыз қызмет етіп, антқа адал болсаңыздар, Қазақстанның қорғаныс қабілеті нығая түсетініне сенімдімін.

Мемлекет басшысы «Томирис» қыздар құрамасының жетістігіне айрықша тоқталды. Қазақстандық әйелдер турнирде үздік атанды. Қасым-Жомарт Тоқаев арнайы бөлімшелердің қызметкерлері мен әскерилер әрқашан тәртіптің, кәсібиліктің, мемлекет мүддесін қорғау үшін батыл іс-қимылдарға әзірліктің үлгісі болуы тиіс екенін атап өтті. Президент еліміз тарихи өзгерістер қарсаңында тұрғанын еске салды: 15 наурызда бүкілхалықтық референдумда қазақстандықтар жаңа Конституция бойынша өз таңдауларын жасайды.

Қасым-Жомарт Тоқаев, Қазақстан Республикасының Президенті:

– Басты құжаттың жобасында егемендігімізді және мемлекеттігімізді нығайтатын мызғымас рухани және құқықтық құндылықтар бекітілді. Қазақстан Республикасының аумақтық, яғни жерінің тұтастығы, егемендігі, тәуелсіздігі, адам мен оның өмірі, барлық азаматтардың құқықтары және бостандықтары ең жоғары құндылықтар ретінде жарияланды. Жауапты әрі жасампаз отаншылдық ұғымы айқындалды. Әділетті Қазақстан идеясы, Заң және тәртіп қағидаты жаңа Конституция жобасында лайықты орнын тапты.

Мемлекет басшысының Жарлығымен бір топ офицер мен әскерилер Бауыржан Момышұлы атындағы ІІ дәрежелі «Айбын» орденімен, «Жауынгерлік ерлігі үшін» медалімен және Қазақстан Республикасы Президентінің Алғысымен марапатталды.

Веб-редактор: Нұрбек Балгүл Қайрошқызы