Қазақстан Президенті ел дамуының негізгі бағыттарын белгіледі

Қазақстан Президенті Ұлттық құрылтайдың 5-ші отырысында еліміздің елеулі жетістіктеріне тоқталды. Былтыр экономикамыз 6,5% өсті. Еліміздің ішкі жалпы өнімі 300 млрд доллардан асып, жан басына шаққанда 15 мың долларға жетті. Бұл – Орталық Азиядағы рекордтық  көрсеткіш. Ұлттық қордың валюталық активтері 5 млрд долларға ұлғайды. Алтын-валюта қорымыз ең жоғары деңгейге жетіп, 65 млрд доллардан асты. Алайда, шұғыл өзгерістер қажет салалар бар. Қасым-Жомарт Тоқаев жоғары технологияға негізделген, энергияны көп қажет етпейтін жаңа экономика құру үшін, ең алдымен, мықты инфрақұрылым қалыптастыру қажет деді. Бұған қажетті барлық тетіктер алдын ала ескерілуі тиіс. Атап айтқанда, қуатты дата-орталықтар құрылысы орнын анықтау және оларға қажетті инфрақұрылым тарту керек.

Қасым-Жомарт Тоқаев, Қазақстан Республикасының Президенті:

- Біз атом стансаларының құрылысы аяқталғанын күтпей-ақ, жаңа қуат көздерін іске қосуды қолға алуымыз керек. Сондай-ақ дата-орталықтар металлургия комбинаттары сияқты көп мөлшерде энергия тұтынатынын қаперде ұстаған жөн. Сол себепті, қуат көздерінің жеткілікті болуын қамтамасыз ету мемлекеттік саясаттың аса маңызды бөлігі ретінде қарастырылуға тиіс. Қазақстанда 123,1 миллиард киловатт-сағат көлемінде электр қуаты өндіріледі. Барлық жоспарымызды табысты орындауға бұл жеткіліксіз.

Қазақстанның 33 млрд тоннаға жуық көмір қоры бар. Біз бұл стратегиялық активімізді белсенді пайдалануымыз қажет, - деді Президент. Үкіметке көмірден қуат өндіру ісіне Ұлттық жоба мәртебесін беру тапсырылды. Күн тәртібінде Көкшетау, Семей және Өскемен қалаларындағы жылу электр орталықтарының құрылысын жылдамдату мәселесі де көтерілді.

Қасым-Жомарт Тоқаев, Қазақстан Республикасының Президенті:

- Курчатовтағы электр станциясы мен Екібастұздағы 2-ГРЭС-тің қосымша энергоблоктарын уақтылы іске қосу, 3-ГРЭС-тің құрылысын бастау қажет. Энергетика жүйесінің орнықты болуын қамтамасыз ету үшін теңгерімді қуат көздерін тезірек іске қосу қажет. Бұл – ең алдымен газдан қуат өндіруге қатысты мәселе. Жаңа кен орындарын іздеу арқылы табиғи газ өндіру ісінің әлеуетін арттыру керек.

Көлік-логистикалық кешенге мұқият назар салу қажет. Бұл бағытта Қасым-Жомарт Тоқаев автожолдарды халықаралық стандарттарға сәйкес жаңғыртудың маңызына тоқталды. Биыл еліміздің тасымал әлеуетін кеңейтетін бірқатар жобалар іске асырылып жатыр. Мемлекет басшысы әуе жүк тасымалына да көңіл бөлу қажет деді. Қасым-Жомарт Тоқаевтың Құрылтайда көтерген мәселелер ауқымы кең болды, жиында елдің дамуына негіз боларлық салалар талқыланды. Мемлекет басшысы су мәселесін де ортаға салды. Президент Солтүстік Аралды қалпына келтіру жөніндегі жобаны жалғастыру қажеттігін атап өтті. Қазір Көкарал бөгетін биіктету шаралары қолға алынып жатыр.

Қасым-Жомарт Тоқаев, Қазақстан Республикасының Президенті:

- Арал ғана емес, Каспийдің, Балқаштың, Ертістің тағдырын шешу үшін көршілермен мәмілеге келіп, келісімдерге қол қоюымыз қажет. Су – еліміз үшін стратегиялық ресурс. Біз су мәселесімен жүйелі түрде айналысуымыз керек. Мен былтыр Біріккен Ұлттар Ұйымы аясында Халықаралық су ұйымын құруды ұсындым. Біріккен Ұлттар Ұйымын реформалау барысында осы мәселені алға қарай жылжытуымыз қажет.

Президент еліміздегі ауқымды реформаларды іске асыруда Ұлттық құрылтай айрықша рөл атқарғанын айтты. Төрт жылда Құрылтай мүшелері ел өміріне оң ықпал тигізген маңызды бастамалар көтеріп, Ұлттық Құрылтайда айтылған ұсыныстардың негізінде 26 заң қабылданды. 

Веб-редактор: Айнұр Досан