Қазақстан энергетика саласын жаңғыртуда

Қазақстан Үкіметі көмір генерациясын дамыту жөніндегі ұлттық жобаны әзірлеуге кірісті. Премьер-Министр жауапты министрліктерге бұл жұмысты бір-ай ішінде тындыруды тапсырды. Бағдарламада қоршаған ортаны қорғауға бағытталған «таза көмір» технологияларына басымдық беріледі. Жоспарға жалпы қуаты 7,6 гигаватт болатын жобалар кіреді. Айта кетейік, Мемлекет басшысы Ұлттық құрылтайдың бесінші отырысында Үкіметке көмірдің экологияға тигізетін зиянды әсерін азайтып, заманауи технологиялар арқылы барынша тиімді пайдалануды жүктеген болатын.

Олжас Бектенов, ҚР Премьер-Министрі:

- Осыған байланысты «Самұрық-Қазына» қорына қаңтар айының соңына дейін Көкшетау, Семей мен Өскемен қалаларында жылу электр орталықтарын салу жобаларын іске асыру бойынша келісімшарттарды бекітуді тапсырамын. Құрылыс жұмыстарына алдағы сәуір айында кірісу керек.  2-ші ГРЭС-ті кеңейту бойынша құрылыс барысын ерекше бақылауға алу қажет. Сондай-ақ, биыл Курчатовтағы ЖЭО және Екібастұздағы 3-ші ГРЭС жобаларының техникалық құжаттамасын дайындауды аяқтау керек.

Президент Құрылтайда жаңа кен орындарын іздеу есебінен табиғи газдың әлеуетін де күшейтуді тапсырған болатын. Қазіргі уақытта аталған бағытта шамамен 515 млрд текше метр көгілдір отынды алдын ала ресурстық бағалаумен жер қойнауының 14 учаскесінде жұмыстар жүргізілуде.

Ерлан Ақкенженов, ҚР Энергетика министрі:

- Орта мерзімді перспективада геологиялық барлау портфелін газдың жиынтық ресурстық бағасы шамамен 1,7 трлн текше метр болатын 30 учаскеге дейін кеңейту көзделеді. Бұл өндірісті ұлғайту және болжамды ішкі сұранысты жабу үшін тұрақты негіз қалыптастыруға мүмкіндік береді. Сонымен бірге инвестициялық қызметті жандандыру және геологиялық тәуекелдерді бөлу мақсатында жер қойнауының 50 жуық учаскесін электрондық аукциондарға шығару жоспарлануда.

Сондай-ақ, сала министрі елімізде су-энергетикалық ресурстардың біріңғай цифрлық картасы әзірленіп жатқанын жеткізді. Бұл жоба Ұлттық деңгейдегі электрондық жүйегеге кіріктіріледі. Платформада елдің гидрологиялық, жер бедері, инфрақұрылымдық және құқықтық деректерін қамтымақ. Сонымен қатар, сандық карта оңтайлы жобалық шешімдерді қалыптастыруға, болашақ станциялардың көрсеткіштерін есептеп, дайындық мерзімдерін қысқартуға мүмкіндік береді. 

Веб-редактор: Нұрбек Балгүл Қайрошқызы