Қазақстан Азия инфрақұрылымдық инвестициялар банкімен құны 2,6 млрд долларды құрайтын жобаларды жүзеге асыруда

Азия инфрақұрылымдық инвестициялар банкі Қазақстанның маңызды стратегиялық серіктесі. Бұл туралы Қасым-Жомарт Тоқаев аталған банктің президенті Цзоу Цзяимен кездесуде атап өтті. Мемлекет басшысы Серіктестік туралы негіздемелік келісімге қол қойылғанын құптады. Аталған құжаттың орнықты экономикалық дамуды ілгерілету мен өңірлік ынтымақтастықты нығайтуда мәні зор.

Қасым-Жомарт Тоқаев, Қазақстан Республикасының Президенті:

- Банкпен бірге жалпы сомасы 2,6 миллиард доллардан асатын 9 жобаны жүзеге асырып жатырмыз. Мұның бәрі өзара ықпалдастығымыз бен байланысымызды жандандыра түсетініне сенімдімін.

Тараптар бірлескен қызмет аясын тереңдетуге айтарлықтай мүмкіндік бар екеніне тоқталды. Таяу жылдары Қазақстан инфрақұрылым секторын жаңғырту бойынша ауқымды жоспарды жүзеге асыруға ниетті. Айта кетейік, бүгінде Азия инфрақұрылымдық инвестициялар банкі Қазақстанда бірқатар ірі жобаға қолдау көрсетіп келеді. Атап айтсақ, жел электр стансасы, Жезқазған – Қарағанды, Ақтөбе – Қарабұтақ – Ұлғайсын автокөлік жолдары және Алматы қаласын айналып өтетін теміржол салу жобаларына қаржы бөлуде.

Цзоу Цзяи, Азия инфрақұрылымдық инвестициялар банкінің президенті:

– Ыстық ықыласыңыз бен ұзақ жылдар бойы Азия инфрақұрылымдық инвестициялар банкіне көрсеткен қолдауыңыз үшін алғыс айтамын. Қазақстан мен басқа да акционерлердің маған артқан сеніміне дән ризамын. Банк қызметінде алғашқы онжылдықтағы жетістіктерге негізделген сабақтастықты сақтаймын. Сондай-ақ, тұтынушылардың өзгеріп жатқан сұраныстарына жедел жауап беру үшін қаржы институтын одан әрі өркендетуге тырысамын.

Веб-редактор: Айнұр Досан