Қ. Тоқаев Digital Qazaqstan жобасы бойынша кеңес өткізді

Ақордада Digital Qazaqstan жобасының жүзеге асырылуы жөнінде жұмыс кеңесі өтті. Мемлекет басшысына Жоғарғы соттың, Ұлттық банктің және «Самұрық-Қазынаның» цифрлық шешімдері таныстырылды. Мемлекеттік органдардың жетекшілері Қасым-Жомарт Тоқаевқа экономика салаларын және мемлекеттік басқаруды цифрлық тұрғыдан трансформациялау бойынша алдағы жоспар жөнінде мәлімет берді. Қазақстан Президенті жасанды интеллект және цифрландыру жылы аясында ауқымды жұмыс істелуі қажет екеніне назар аударды. Бұл ретте ең алдымен мемлекеттік аппарат қызметін цифрландыруды жеделдету, сондай-ақ ведомствоаралық ақпарат жүйелерін біріздендірілген үдеріске кіріктіру қажет. Бұған қоса, Қасым-Жомарт Тоқаев қағазбастылықтан арылуға баса мән берілу керек деді. Президент Үкіметке мемлекеттік аппаратты түбегейлі трансформациялау міндетін жүктеді. Бұл істі үйлестірумен Жасанды интеллект және цифрлық даму министрлігі айналысады. Мемлекет басшысы ұлттық есептеуші инфрақұрылымды дамытудың маңызына назар аударды. Сондай-ақ, қаржы саласын реттеуші органдарға Үкіметпен және құқық қорғау органдарымен бірлесіп цифрлық активтер саласын дамыту жоспарын әзірлеуді тапсырды.

Веб-редактор: Нұрбек Балгүл Қайрошқызы