Д.Құдайберген жаһандық ізгі ниет елшісі атанды

Димаш Құдайберген БҰҰ-ның жаһандық ізгі ниет елшісі атанды. Бұл туралы Халықаралық көші-қон бойынша ұйым кеңесінің кезекті сессиясында белгілі болды. Ұйым өкілдері қазақстандықтың шығармашылығы адамзаттың рухани құндылықтарын насихаттап келе жатқанын атап өтті. Айта кетейік, Димаш 2024 жылы осы ұйымның аймақтық Ізгі ниет елшісі болып тағайындалған еді. Содан бері ол жаһандық деңгейде мигранттардың құқықтарын қорғау, қауіпсіз және реттелген көші-қон идеясын ілгерілету бағытында халықаралық бастамаларды қолдауға атсалысады. 

Өткен жылы отандық орындаушы Қазақстанға сапармен келген БҰҰ-ның Бас хатшысы Антониу Гутерришпен кездесуде гуманитарлық қызметті өнер арқылы ілгерілету жөніндегі өз көзқарасын таныстырды. Димаш Халықаралық көші-қон ұйымымен ынтымақтастығын кеңейтіп, маңызды іс шаралар өткізді. Мәселен, ол «Stranger» атты ән кешін Нью-Йорк, Мехико, Берлин сияқты қалаларда өткізіп, 100 мыңнан астам адамның қошеметіне бөленген. Көрермен оның әр әні жанға дауа, жүрекке ем екенін айтады. Орындаушы жаһандық ізгі ниет елшісі атағын алу үлкен жауапкершілік сезімімен қабылдаған керемет құрмет екенін атап өтті.

Веб-редактор: Айнұр Досан