Биыл Жамбыл облысына 600 млрд теңгеге жуық инвестиция тартылды

Қазақстан Президенті Жамбыл облысының жұртшылығымен кездесті. Қасым-Жомарт Тоқаев ежелгі өркениеттің ізі қалған шежірелі өңірдің орны ерекше екенін атап өтті. Бүгінде аймақтың экономикасы қарқынды дамып келеді. Биыл облысқа 600 млрд теңгеге жуық инвестиция тартылды. 63 мыңнан астам жаңа жұмыс орны ашылды. Мемлекет басшысы еліміз қуатты болуы үшін ең алдымен, аймақтар қуатты болуы тиіс деді. Бұл қазірдің өзінде айқын сезіліп отыр, Бүгінде біздің еліміз – жаһандық үдерістердің белсенді қатысушы. Біз Орталық Азияда және Кавказ аймағындағы экономикасы ең ірі ел саналамыз. Тек биылдың өзінде халықаралық кездесулердің нәтижесінде жалпы құны 70 млрд доллардан асатын коммерциялық келісімдерге қол қойылды.

Қасым-Жомарт Тоқаев, Қазақстан Республикасының Президенті:

- Орталық Азия плюс» форматына сұраныс артып келеді. Биыл аймақ елдері Еуропа Одағымен, Италиямен, Қытаймен, Ресеймен, АҚШ-пен және Жапониямен бірлескен келіссөздер жүргізді. Аймаққа тартылған инвестицияның 60 пайыздан астамы Қазақстанға тиесілі. Инвестициямен бірге жаңа технология, білім келеді, бірлескен ғылыми-техникалық орталықтар мен шетелдік жоғары оқу орындарының филиалдары ашылады. Қазақстан тауарлары мен отандық бизнеске кез келген шекара ашық.

Жалпы жаһандық тұрақсыздық пен күрделі геосаяси ахуалға қарамастан Қазақстан бейтарап ұстаныммен байсалды сыртқы саясатын жүргізіп келеді. Бұл еліміздің дамуына қолайлы жағдай жасауда. Қазақстан түбегейлі қайта құрулар бағытында дәйекті жұмыс жасауда. Конституциялық реформа жүргізілді, экономикада ауқымды өзгерістер орын алып жатыр. Осының бәрі еліміздің дамуы үшін нақты нәтижелер берді.

Қасым-Жомарт Тоқаев, Қазақстан Республикасының Президенті:

- Соңғы бес жылда ұлттық экономика 15,8 пайызға өсті. Биылғы өсім 6 пайыздан асты. Бұл – 2012 жылдан бергі ең жоғары көрсеткіш. Жан басына шаққанда ішкі жалпы өнім 47 пайызға артты. Алтын-валюта резерві және Ұлттық қор активтерінің көлемі рекордтық межеге жетіп, 125 миллиард доллардан асты.

Қазақстанның өнеркәсіп саласы тың серпінге ие болды. Елімізде ірі өндіріс өшақтары ашылуда. Биылдың өзінде 33 зауыт іске қосылды. Жергілікті ауыл шаруашылығындағы жалпы өнім соңғы он жылда 2,5 есе өсті. Мемлекет шаруаларға қаржылық қолдау көрсетудің оңтайлы жолдарын ұсынып жатыр. Құрылыс саласында тың көрсеткіштер тіркеліп отыр. 19 млн шаршы метрден астам тұрғын үй пайдалануға берілді.

Қасым-Жомарт Тоқаев, Қазақстан Республикасының Президенті:

- Бірінші қаңтардан бастап жаңа Салық кодексі күшіне енеді. Салық жүйесі бақылау-жазалау тәсілінен бизнес өкілдерімен сенімді серіктестік орнату тәсіліне көшуі керек. Бұл – Үкіметтің алдында тұрған міндет. Облыстардағы іскерлік ахуалды жақсарту үшін «Іскер аймақ» бағдарламасы жүзеге асырылады. Бұл жоба, ең алдымен, ауылдар мен шағын қалаларда кәсіпкерлікті дамытуға арналған.

Мемлекет басшысы Таразда жаңадан ашылған әскери мектеп-интернатқа Бауыржан Момышұлының есімін беруді ұсыды. Бұл – оңтүстік аймақтарда ашылған осындай алғашқы оқу орны. Қазақстан Президенті әйгілі батыр, даңқты қолбасшыға «Халық қаһарманы» атағын  берді. Қасым-Жомарт Тоқаев сондай-ақ Жамбыл облысының 14 тұрғынына еліміздің экономикалық және өнеркәсіптік дамуына қосқан үлесі үшін мемлекеттік наградаларды тапсырды.

Веб-редактор: Айнұр Досан