Астанада үздік 10 «жасыл» жоба таныстырылды

Астанада GCIP халықаралық бағдарламасы аясында іріктелген жылдың үздік 10 «жасыл» жобасы таныстырылды. Конкурстың ұлттық кезеңі финалына энергия үнемдеу, жасыл энергетика, ақылды су пайдалану, экологиялық материалдар және көміртегі қалдығын азайтатын цифрлық технологиялар саласындағы тың шешімдер шықты. Халықаралық жасыл технологиялар орталығы басшысының айтуынша, мұндай бастамалар жасыл шешімдердің жаңа нарығын қалыптастырады және Қазақстанның әлемдік деңгейдегі бәсекеге қабілетті инновацияларды ұсына алатынын көрсетеді.

Сәкен Қалқаманов, Халықаралық жасыл технологиялар орталығы басқармасының төрағасы:

- Жаһандық инновациялық бағдарлама 16 елде жүзеге асырылады және жыл сайын барлық 16 елдің жеңімпаздары жиналатын халықаралық стартаптар байқауы өтеді. Қазақстанның 2024 жылғы үздік жобасы биыл Ыстамбұлда өткен сайыста бірінші орын еншіледі. Ал, бүгінгі сайыстың жеңімпазы келесі жылы Венада өтетін халықаралық сайыста бақ сынайды. 

Сарапшылар жасанды интеллект пен цифрлық технологияларды өнеркәсіп және агросекторға кіріктіруге басымдық берілгенін айтты. Қатысушылар арасынан жаңа буындағы шағын электр тракторын ұсынған AiTOQ стартапы дараланды. Экологияға зиянды әсерді төмендетуді көздейтін жоба GCIP жарты жылдық халықаралық акселераторына еніп, жаңа техниканы өнеркәсіптік деңгейге дейін жетілдірген.

Әлібек Ибраим, ITOQ стартапының негізін қалаушы:

- Біздің трактордың бірнеше ерекшелігі бар. Біріншісі, ол толығымен электрлі. Екіншісі, бізде оңай ауысатын батарея орнатылған, ол 100 шақырым қашықтықты және 4 сағат тоқтаусыз жұмысты қамтамасыз етеді. Жасанды интеллект туралы айтатын болсақ, бізде жеке модульдер бар, яғни сіз тракторды сатып аласыз және оған қосымша лидар орната аласыз. Оның көмегімен техника алқапта жартылай автономды немесе толық офлайн режимде жұмыс істей алады. Яғни, адамға бүкіл егістікті жыртудың қажеті жоқ, ол трактордың дұрыс жұмыс істеуін бақылап, техниканы уақытша кідіртіп, одан шығып, тракторды әрі қарай жүргізушісіз жұмыс істете алады. Кейін трактор тиісті аумақ түгел жыртылғанға дейін үздіксіз жұмыс істей береді.

Іріктелген 10 стартап грант қаржысынан бөлек өз технологияларын Еуропадағы халықаралық алаңда таныстырып, жобаға инвестор тарту әрі жаңа нарыққа шығу мүмкіндігіне де ие болады. 

Веб-редактор: Нұрбек Балгүл Қайрошқызы