Астанада барлық деңгейдегі мәслихат депутаттарының ІІІ республикалық форумы өтті

Астанада барлық деңгейдегі мәслихат депутаттарының ІІІ республикалық форумы өтті. Елордада 2 мыңнан астам аймақ өкілдері бас қосты. Жиынға Қасым-Жомарт Тоқаев қатысты. Қазақстан Президенті өкілді органдарды күшейту мемлекеттік саясаттың негізгі басымдығы болып қала беретінін атап өтті. Маслихаттар мемлекеттік басқару жүйесіндегі басты институттың біріне айналды. Алайда олардың әлеуетін одан әрі күшейту үшін бірқатар міндетті орындауымыз керек деді, - деді Мемлекет басшысы. Бұл ретте аймақтар өз бюджетін мұқият жоспарлап, табысын арттыруға баса мән беруге тиіс. Ал мәслихаттарға жүктелетін міндет – осы қаражаттың тиімді жұмсалуын қатаң бақылау. Президент ол үшін әкімдіктегі бюджеттік комиссияның құрамына мәслихат депутаттарын қосқан жөн деп санайды.

Қасым-Жомарт Тоқаев, Қазақстан Республикасының Президенті:

- Биылдан бастап ауылдық округтер қосымша табыс көзіне ие болмақ. Атап айтқанда, кең таралған пайдалы қазбалар өндірісіне, жерасты сулары мен емдік балшықтарды пайдалануға салынатын салықты өздері жинап, қажетіне жаратады.  Бұл – өте дұрыс ұстаным. Түскен табыс, ең алдымен, сол аймақты дамытуға жұмсалуы керек. Бір сөзбен айтқанда, жергілікті жерде қордаланған мәселелерді шешу үшін мүмкіндік те, ресурс та арта түспек.

Президент сондай-ақ осы жексенбі күні болатын референдумға да тоқталды.  Конституция жобасында жаңа бір палаталы Құрылтайдың депутаттары пропорциялы өкілдік жүйе негізінде сайланады деп көрсетілген. Бұл тұрғыда мәслихаттар болашақ Құрылтайға қажетті кәсіби кадрларды даярлауға белсене атсалысуы керек. Бұл саяси партиялардың рөлін күшейтіп, заң шығару жұмысын неғұрлым жоғары деңгейге көтереді. Қасым-Жомарт Тоқаев халықаралық күн тәртібіне де тоқталып, қазір әлемдегі саяси-экономикалық ахуал шиеленіскенін, «сауда соғысы» жылдан жылға ушығып бара жатқанын айтты. Соған қарамастан, Қазақстан тұрақты даму серпінін сақтап қана қоймай, ұлттық даму стратегиясын дәйекті түрде іске асыруда.

Қасым-Жомарт Тоқаев, Қазақстан Республикасының Президенті:

- Жаңа дәуірге қадам бастық. Озық ойлы ұлт ретінде қазіргі сын-қатерлерге бейімделіп, оған жасампаздықпен жауап беруіміз қажет. Елімізде ауқымды реформалар жүргізуде бір ғана мақсатты көздейміз. Бұл – мемлекетіміздің Тәуелсіздігі мен егемендігін нығайту, азаматтарымыздың құқықтары мен бостандықтарын қорғау, халқымыздың әл-ауқатын жақсарту.

Қ.Тоқаев: Жаңа Конституция негізінде қазақстан дәйекті дамуын жалғастырады

Қасым-Жомарт Тоқаев Жаңа Конституция мәтінін дайындауға тікелей қатысып, оның әрбір тарауы мен бабына мұқият зер салған. Президент адам құқықтары мен бостандықтарын қорғауға арналған тарау ең ауқымды бөлімге айналғанын атап өтті - онда 30 бап бар. Бұл – Ата заңның шамамен үштен бірі. Тағы бір нақты бекітілген жаңа норма биліктің жалғыз көзі және Егемендіктің иесі Қазақстан халқы екенін көрсетеді.  15 наурызда әр азаматымыз Қазақ елінің жасампаздық жылнамасына өз қолтаңбасын қалдыра алады.

Қасым-Жомарт Тоқаев, Қазақстан Республикасының Президенті:

- Алдағы жексенбіде халқымыз дауыс береді. Бұл референдумның Қазақстан тарихындағы орны ерекше болатыны сөзсіз. Азаматтарымыз Конституция жобасын қолдаған жағдайда Қазақстанда жаңа, анағұрлым тиімді, яғни, еліміздің ұзақмерзімді тұрақты дамуына жол ашатын саяси жүйе қалыптасады.

Веб-редактор: Айнұр Досан